لاہور ہائیکورٹ نے پنجاب میں نجی سکولوں کی تعطیلات اور تعلیمی کیلنڈر سے متعلق رولز بنانے کے لیے 13 رکنی کمیٹی تشکیل دے دی۔
جسٹس جواد حسن نے قرار دیا کہ کمیٹی کا پہلا اجلاس 11 ستمبر کو ہوگا جبکہ 16 ستمبر کو عمل درآمد رپورٹ عدالت میں پیش کی جائے گی۔
یہ فیصلہ آل پاکستان پرائیویٹ سکول مینجمنٹ ایسوسی ایشن کی درخواست پر کیا گیا، جس میں حکومت کے تعطیلات بڑھانے کے نوٹیفکیشن کو چیلنج کیا گیا تھا۔ درخواست گزار کا مؤقف تھا کہ حکومت نے کوئی کیلنڈر جاری نہیں کیا، جس کے باعث نجی سکول خود اپنا تعلیمی کیلنڈر بناتے ہیں۔
عدالت نے محکمہ سکول ایجوکیشن کو سپیشل رولز بنانے کا حکم دیا اور کہا کہ کمیٹی تعلیمی سال اور خصوصاً تعطیلات کے حوالے سے سفارشات تیار کرے گی۔
