اسلام آباد میں وفاقی وزیرِ تجارت جام کمال خان سے میٹا کے وفد کی ملاقات میں پاکستان کی بڑھتی ہوئی ڈیجیٹل معیشت، مصنوعی ذہانت اور ای کامرس کے فروغ پر تفصیلی بات چیت کی گئی۔ ملاقات کے دوران دونوں فریقین نے ٹیکنالوجی کے ذریعے اختراع، محفوظ آن لائن ماحول اور معاشی بااختیاری کو فروغ دینے پر اتفاق کیا۔
جام کمال خان نے وفد کو بتایا کہ پاکستان جنوبی ایشیا کی تیزی سے ترقی کرتی ڈیجیٹل معیشتوں میں شامل ہے جہاں ہر سال 75 ہزار سے زائد آئی ٹی گریجویٹس مارکیٹ میں داخل ہوتے ہیں۔ انہوں نے مزید کہا کہ رواں سال آئی ٹی اور آئی ٹی خدمات کی برآمدات میں 18 فیصد اضافہ ہوا ہے، جس سے برآمدات 3.8 ارب ڈالر تک پہنچ چکی ہیں۔ رواں مالی سال کی پہلی سہ ماہی میں بھی آئی ٹی برآمدات 21 فیصد اضافہ دکھا رہی ہیں، جو 1.06 ارب ڈالر تک جا پہنچی ہیں۔
وزیرِ تجارت نے بتایا کہ نیشنل ای کامرس پالیسی 2.0 کو حتمی شکل دی جا رہی ہے، جس کا ہدف 2030 تک 20 ارب ڈالر کی مارکیٹ حاصل کرنا ہے۔ انہوں نے میٹا کو مصنوعی ذہانت کے اخلاقی استعمال، ڈیجیٹل سیفٹی اور ای کامرس اسٹینڈرڈز میں شراکت داری کی دعوت دی۔ جام کمال خان نے نوجوانوں کے لیے اے آئی اسکلنگ پروگرامز میں میٹا کے ساتھ تعاون بڑھانے کی بھی تجویز دی اور بتایا کہ پاکستان نے نیشنل اے آئی پالیسی 2025 اور ڈیجیٹل نیشنل پاکستان ایکٹ کے تحت نمایاں پیش رفت کی ہے۔
میٹا کے نمائندہ رافیل فرانکل نے پاکستان کی ڈیجیٹل ترقی کی تعریف کی اور کہا کہ میٹا پاکستان میں مقامی کاروباریوں اور چھوٹے کاروباری اداروں کے لیے ڈیجیٹل تربیتی پروگرامز کو مزید وسعت دے گا۔ انہوں نے ٹیکنالوجی کے مختلف شعبوں میں پاکستان کے ساتھ تعاون بڑھانے کی یقین دہانی بھی کرائی۔
ملاقات کے اختتام پر دونوں فریقین نے اس بات پر اتفاق کیا کہ پاکستان میں ڈیجیٹل ترقی، محفوظ آن لائن ماحول اور نوجوانوں کی معاشی بااختیاری کے فروغ کے لیے باہمی تعاون کو مزید آگے بڑھایا جائے گا تاکہ ملک کی ڈیجیٹل معیشت مضبوط بنیادوں پر استوار ہو سکے۔
