ترکیہ میں مقیم ایک سابق عراقی سنار نے 6 سال کی مسلسل محنت کے بعد دنیا کا سب سے بڑا ہاتھ سے لکھا ہوا قرآنِ پاک تیار کر لیا، جس کے صفحات 4 میٹر لمبے اور ڈیڑھ میٹر چوڑے ہیں۔
1971 میں عراقی شہر سلیمانیہ میں پیدا ہونے والے علی زمان بچپن سے ہی اسلامی خطاطی کے شوقین تھے۔ 2013 میں انہوں نے سنار کا پیشہ چھوڑ کر خود کو مکمل طور پر خطاطی کے فن کے لیے وقف کر دیا۔
2017 میں وہ اپنے اہلِ خانہ کے ہمراہ ترکیہ کے شہر استنبول منتقل ہوئے جہاں انہوں نے محرمہ سلطان مسجد کے ایک چھوٹے سے کمرے میں روزانہ کئی گھنٹے اس عظیم منصوبے پر کام جاری رکھا۔ یہ منصوبہ مکمل طور پر خود فنڈڈ تھا۔
صحت کے مسائل کے باوجود انہوں نے ہمت نہیں ہاری اور آخرکار 6 سال کی انتھک محنت کے بعد دنیا کا سب سے بڑا ہاتھ سے لکھا گیا قرآنِ پاک مکمل کر لیا، جسے انہوں نے روایتی ریڈ پین سے تحریر کیا۔ وہ ہر حرف اپنے ہاتھ سے نہایت باریکی کے ساتھ لکھتے رہے اور کسی جدید آلے کا استعمال نہیں کیا۔
ترک میڈیا کے مطابق علی زمان کا تیار کردہ یہ نسخہ دنیا کے پچھلے سب سے بڑے قرآن سے بھی بڑا ہے، جس کا سائز 2.28 میٹر × 1.55 میٹر تھا۔
علی زمان کئی ممالک — شام، ملائیشیا، عراق اور ترکیہ — میں خطاطی کے بین الاقوامی ایوارڈز جیت چکے ہیں۔ 2017 میں انہیں ترکیہ کے International Hilye-i Serif مقابلے میں صدر رجب طیب اردوان کی جانب سے بھی ملا تھا۔
علی زمان کا کہنا ہے کہ ایسی تخلیق کرنا ان کے لیے بڑی خوشی کی بات ہے، جو بہت کم لوگ انجام دے سکتے ہیں۔ ان کے خاندان کا ارادہ ہے کہ اس تاریخی نسخے کو ترکیہ میں ہی محفوظ رکھا جائے تاکہ اسلامی خطاطی کی عظیم روایت کو دنیا بھر میں اجاگر کیا جا سکے۔
