غزہ کی وزارتِ صحت نے کہا ہے کہ 73 سالہ اسرائیلی یرغمالی مینی گوڈارڈ کی باقیات کے بدلے آج مزید 15 فلسطینیوں کی لاشیں ریڈ کراس کے ذریعے موصول ہوئی ہیں۔ حماس نے مذکورہ یرغمالی کی باقیات جمعرات کے روز اسرائیل کے حوالے کی تھیں۔
وزارتِ صحت کے مطابق جنگ بندی معاہدے کے تحت اسرائیل سے واپس ملنے والی فلسطینی لاشوں کی مجموعی تعداد 330 ہو گئی ہے، جن میں سے صرف 97 کی شناخت ممکن ہوسکی ہے، جبکہ دیگر لاشیں شدید مسخ اور ناقابلِ شناخت حالت میں ہیں۔
معاہدے کے مطابق حماس اب تک 25 اسرائیلی یرغمالیوں کی باقیات اور 20 زندہ یرغمالیوں کو اسرائیل کے حوالے کر چکا ہے۔ مزید تین لاشیں حماس کے پاس موجود ہیں، جنہیں بھی معاہدے کے تحت جلد واپس کیے جانے کا امکان ہے۔
معاہدے کے تحت ہر ایک اسرائیلی یرغمالی یا اس کی باقیات کے بدلے 15 فلسطینیوں کی لاشیں واپس کی جاتی ہیں۔
