سپین کے شہری اینریکے آریاس گِل پر ہسپانوی حکام کی جانب سے روس کے حق میں جاسوسی اور سائبر حملوں میں ملوث ہونے کے الزامات عائد کیے گئے تھے، تاہم انہوں نے ان الزامات کو سیاسی قرار دیتے ہوئے روس میں سیاسی پناہ حاصل کر لی ہے۔
اینریکے آریاس گِل نے بتایا کہ انہوں نے فروری 2025 میں روسی فیڈریشن سے سیاسی پناہ کی درخواست دی تھی، جو منظور کر لی گئی، اور وہ اس وقت روس میں بطور سیاسی پناہ گزین مقیم ہیں۔
یورپی میڈیا رپورٹس کے مطابق سپین کی ایک عدالت نے اینریکے آریاس گِل کے خلاف بین الاقوامی وارنٹِ گرفتاری جاری کر رکھا تھا، جبکہ یوروپول نے بھی انہیں مطلوب افراد کی فہرست میں شامل کیا ہوا تھا۔
ان پر الزام عائد کیا گیا ہے کہ وہ ایک ٹیلی گرام چینل کے ذریعے روس کے حق میں معلوماتی مہم چلا رہے تھے، جبکہ بعض رپورٹس میں انہیں ایک مبینہ ہیکر گروپ سے وابستہ بھی قرار دیا گیا ہے۔
اینریکے آریاس گِل اگست 2024 میں روس پہنچے تھے، جہاں وہ ماسکو میں قائم ایک روسی ثقافتی ادارے کی اسکالرشپ پر تعلیمی سرگرمیوں میں مصروف رہے۔ ان کا کہنا ہے کہ سپین میں ان کے خلاف قائم مقدمات سیاسی نوعیت کے ہیں، جس کے باعث انہیں ملک چھوڑنے پر مجبور ہونا پڑا۔
دوسری جانب روسی ذرائع کے مطابق اینریکے آریاس گِل اب روسی شہریت کے حصول کے لیے درکار قانونی دستاویزات کی تیاری کر رہے ہیں۔
