کراچی میں سڑکوں کی ابتر حالت نے شہریوں کے ساتھ ساتھ قومی سطح کے کھلاڑیوں کو بھی متاثر کرنا شروع کر دیا ہے، جس پر اب نمایاں شخصیات بھی کھل کر بات کر رہی ہیں۔
قومی ویمن کرکٹ ٹیم کی کپتان فاطمہ ثناء نے شہر کی ٹوٹی پھوٹی سڑکوں پر اپنی تشویش کا اظہار کرتے ہوئے سوال اٹھایا ہے کہ آخر ان مسائل کا حل کب نکالا جائے گا۔
سوشل میڈیا پر وائرل ہونے والی ایک ویڈیو میں فاطمہ ثناء کو معروف سماجی رہنما ظفر عباس سے گفتگو کرتے دیکھا جا سکتا ہے، جہاں انہوں نے براہ راست سوال کیا کہ کراچی کی سڑکیں کب ٹھیک ہوں گی۔
اس پر ظفر عباس نے جواب دیا کہ وہ اس مسئلے پر پہلے بھی آواز اٹھا چکے ہیں، تاہم اب اس کا حل کراچی کے عوام اور متعلقہ اداروں کو مل کر نکالنا ہوگا۔
واضح رہے کہ شہر میں سڑکوں کی خراب حالت کے باعث شہری شدید مشکلات کا شکار ہیں۔ جگہ جگہ گڑھے، ٹریفک جام اور حادثات روزمرہ کا معمول بنتے جا رہے ہیں، جس نے عوام کی زندگی کو متاثر کر دیا ہے۔
