اسلام آباد: دفتر خارجہ نے اسرائیلی قابض افواج کے ہاتھوں حراست میں لیے گئے پاکستان کے سابق سینیٹر مشتاق احمد خان اور دیگر پاکستانی شہریوں کی واپسی سے متعلق بیان جاری کیا ہے۔
ترجمان دفتر خارجہ کے مطابق صمود فلوٹیلا میں سوار پاکستانی شہریوں کے بارے میں ایک یورپی ملک کے سفارتی ذرائع سے تصدیق ہوئی ہے کہ سابق سینیٹر مشتاق احمد اسرائیلی تحویل میں محفوظ اور خیریت سے ہیں۔ انہیں مقامی قانونی طریقہ کار کے تحت عدالت میں پیش کیا جائے گا اور ملک بدری کے احکامات جاری ہوتے ہی ان کی واپسی یقینی بنائی جائے گی۔
دفتر خارجہ نے کہا کہ پاکستان اپنے بین الاقوامی شراکت داروں سے مسلسل رابطے میں ہے تاکہ غیر قانونی طور پر گرفتار پاکستانی شہریوں کی سلامتی اور فوری واپسی ممکن بنائی جا سکے۔ وزارت خارجہ پہلے ہی اُن افراد کی واپسی کو ممکن بنا چکی ہے جنہوں نے پہلے مرحلے میں فلوٹیلا سے علیحدگی اختیار کی تھی، اور اس سلسلے میں تعاون کرنے والے برادر ممالک کا شکریہ ادا کیا گیا۔
بیان میں مزید کہا گیا کہ حکومت پاکستان بیرون ملک اپنے شہریوں کے تحفظ کے لیے پرعزم ہے اور توقع ہے کہ آئندہ چند دنوں میں باقی شہریوں کی واپسی کا عمل مکمل ہو جائے گا۔
