راولپنڈی: انسداد دہشت گردی عدالت نے 26 نومبر احتجاج کیس میں پاکستان تحریک انصاف (پی ٹی آئی) کے مزید چار کارکنان کو قید کی سزا سنادی ہے۔
اے ٹی سی کے جج امجد علی شاہ نے تھانہ ہنجرا اٹک میں درج مقدمے کی سماعت کی، جس میں پراسیکیوٹر ظہیر شاہ اور ملزمان کے وکلا عدالت میں پیش ہوئے۔
عدالت نے پی ٹی آئی کارکنان عامر خان، سردار خان، خان محمد اور جاوید اقبال کو ہر ایک کو چار ماہ قید کی سزا سنائی۔ سزا جلاؤ گھیراؤ کی دفعات کے تحت دی گئی۔
ملزمان نے عدالت میں اقبال جرم کیا اور اعترافی بیان میں کہا کہ قیادت کے اکسانے پر وہ پُرتشدد احتجاج میں شامل ہوئے، اور چونکہ وہ غریب مزدور ہیں، سزاؤں میں نظر ثانی کی جائے۔
واضح رہے کہ مئی میں اسلام آباد ہائیکورٹ نے 26 نومبر احتجاج کے دوران گرفتار 86 پی ٹی آئی کارکنان کو رہا کرنے کا حکم دیا تھا۔ اس وقت کے قائم مقام چیف جسٹس سرفراز ڈوگر اور جسٹس محمد آصف نے کارکنان کی ضمانتیں منظور کی تھیں۔
فروری میں بھی اسلام آباد ہائیکورٹ نے 26 نومبر احتجاج کیس میں گرفتار تمام 120 کارکنوں کی ضمانتیں منظور کیں اور فوری رہائی کا حکم دیا۔
