چین کے شمال مغربی علاقے میں ایک زیر تعمیر پل کا ایک حصہ گرنے سے 12افراد ہلاک اور چار لاپتہ ہو گئے ہیں۔سرکاری نشریاتی ادارے سی سی ٹی وی کی جانب سے شائع کی گئی ایک ویڈیو میں دیکھا جا سکتا ہے کہ پل کے محراب والے حصے کا درمیانی حصہ اچانک راستہ چھوڑ کر نیچے دریائے زرد کے پانی میں گر گیا۔چین کی سرکاری خبر رساں ایجنسی ژنہوا کے مطابق دھماکے کی وجہ اسٹیل کیبل فیل ہونا تھا۔
پیپلز ڈیلی اخبار کا کہنا ہے کہ اس وقت 15 کارکن اور ایک پروجیکٹ منیجر موقع پر موجود تھے۔سی سی ٹی وی کی رپورٹ کے مطابق 12 افراد کی ہلاکت کی تصدیق کی گئی ہے اور چار افراد اب بھی لاپتہ ہیں۔پیپلز ڈیلی کے مطابق سیچوان-چنگ ہائی ریلوے کا پل دنیا کا سب سے بڑا ڈبل ٹریک مسلسل سٹیل ٹراس آرچ پل ہے۔رپورٹ میں کہا گیا ہے کہ یہ چین کاپہلا ریلوے سٹیل ٹرس آرچ پل ہے جو ملک کا دوسرا طویل ترین دریائے زرد پر پھیلا ہوا ہے۔
سرکاری میڈیا پر شائع ہونے والی تصاویر میں جزوی طور پر تعمیر کیے گئے پل کو دکھایا گیا ہے جس کا درمیانی حصہ غائب ہے اور اس کے ساتھ دو بڑے ٹاور اور کئی کرینیں ہیں۔ شنہوا نے بتایا کہ سیکڑوں امدادی کارکنوں کو تلاش اور بچاؤ کے آپریشن کے لئے متحرک کیا گیا تھا۔مبہم قواعد و ضوابط اور کمزور حفاظتی معیارات کی وجہ سے چین میں صنعتی حادثات کافی عام ہیں۔گزشتہ سال دسمبر میں جنوبی چین کے شہر شینزین میں ریلوے کی ایک تعمیراتی جگہ پر غار میں گرنے سے 13افراد لاپتہ ہو گئے تھے۔ زندہ بچ جانے والوں کی کوئی اطلاع نہیں ہے۔
