پاکستان پیپلزپارٹی کے چیئرمین بلاول بھٹو زرداری نے قصور میں سیلاب متاثرین سے گفتگو کرتے ہوئے کہا کہ پنجاب میں سیلاب سے شدید نقصان ہوا ہے اور وفاقی حکومت کو بڑا کردار ادا کرنا چاہیے۔ انہوں نے وزیراعلیٰ پنجاب مریم نواز کی محنت کا اعتراف کرتے ہوئے کہا کہ یہ آفت صوبائی حکومت کے تنہا بس کی بات نہیں۔
بلاول بھٹو نے کہا کہ کسانوں کو سب سے زیادہ نقصان ہوا ہے، زرعی ایمرجنسی نافذ کی جائے اور بیج، کھاد، قرض اور بجلی میں سہولت دی جائے۔ گھروں اور کاروبار کے نقصانات کا تخمینہ لگایا جائے اور بے نظیر انکم سپورٹ کے ذریعے متاثرین کو ترجیحی بنیاد پر امداد دی جائے۔
انہوں نے کہا کہ وفاقی حکومت کو سب صوبوں کی مدد کرنا ہوگی اور اس مشکل وقت میں سیاست سے بالاتر ہو کر کام کیا جائے۔ ان کا کہنا تھا کہ سیلاب بھارت سے آنے والے دریا سے آیا، مودی سرکار نے سندھ طاس معاہدے کی خلاف ورزی کی اور بروقت پانی چھوڑنے کی اطلاع نہیں دی۔ بلاول بھٹو نے کہا کہ بھارت پانی کو ہتھیار بنا رہا ہے اور اس مسئلے کو عالمی سطح پر اٹھانا ہوگا۔
