افغانستان سے تعلق رکھنے والا 13 سالہ لڑکا کابل ایئرپورٹ کے ممنوعہ حصے میں داخل ہو کر افغان ایئرلائن کی پرواز کے لینڈنگ گیئر میں چھپ گیا۔ تقریباً دو گھنٹے کے بعد جہاز دہلی پہنچا، جہاں عملے نے لڑکے کو جہاز کے قریب گھومتے ہوئے دیکھا اور فوری طور پر سیکیورٹی کو اطلاع دی۔
ابتدائی تحقیقات میں معلوم ہوا کہ لڑکا قندوز شہر کا رہائشی ہے اور اس نے یہ قدم محض تجسس میں اٹھایا تھا۔ سیکیورٹی حکام نے بتایا کہ لینڈنگ گیئر انتہائی خطرناک ہوتا ہے کیونکہ وہاں آکسیجن نہ ہونے کی وجہ سے زندہ رہنا مشکل ہے، مگر خوش قسمتی سے لڑکا محفوظ رہا۔
بعد ازاں لڑکے کو حراست میں لے کر پوچھ گچھ کے بعد اسی ایئرلائن کی پرواز سے افغانستان واپس بھیج دیا گیا۔ ایئرلائن نے لینڈنگ گیئر میں لڑکے کا سرخ اسپیکر بھی دریافت کیا، جبکہ طیارے کی مکمل جانچ کے بعد اسے محفوظ قرار دیا گیا۔
