کوئٹہ: لیویز فورس پشین نے ایک کامیاب آپریشن کے ذریعے لاہور سے اغوا ہونے والے 17 سالہ فہد علی کو بحفاظت بازیاب کر لیا۔ نوجوان کو کوئٹہ میں ایک مسافر کوچ کی اسنیپ چیکنگ کے دوران پکڑا گیا، جہاں سے اسے غیر قانونی طور پر ایران اور پھر ترکی منتقل کرنے کا منصوبہ تھا۔
ضلعی انتظامیہ کے مطابق فہد علی کا اغوا 13 اکتوبر 2025 کو لاہور میں درج مقدمے کے تحت کیا گیا تھا، اور اغوا کاروں نے اسے غیر ملکی سرزمین پر منتقل کرنے کی منصوبہ بندی کی تھی۔ کارروائی کے دوران لیویز نے اغوا میں ملوث نواز نامی شخص کو گرفتار کیا، جبکہ تفتیش جاری ہے تاکہ دیگر عناصر کا سراغ لگایا جا سکے۔
سیکیورٹی ذرائع کے مطابق فہد علی کو تحفظ میں لے لیا گیا ہے اور جلد اہل خانہ کے حوالے کیا جائے گا۔ حکام نے قانون نافذ کرنے والے اداروں کی بروقت کارروائی کو سراہا اور عوام سے اپیل کی کہ مشکوک سرگرمیوں کی فوری اطلاع دیں تاکہ ایسے جرائم روکے جا سکیں۔
