پشاور میں میڈیا سے گفتگو کرتے ہوئے خیبر پختونخوا کے نومنتخب وزیراعلیٰ سہیل آفریدی نے کہا کہ وہ عمران خان سے ملاقات کے لیے جا رہے ہیں اور جو لوگ اس میں رکاوٹ ڈال رہے ہیں اُنہیں احساس ہونا چاہیے کہ وہ صوبے کے وزیراعلیٰ ہیں۔
انہوں نے کہا کہ وہ کروڑوں عوام کی نمائندگی کرتے ہیں اور بانی چیئرمین سے رابطہ اُن کا حق ہے۔ ان کا کہنا تھا کہ کابینہ کی جو فہرست گردش کر رہی ہے وہ جعلی ہے اور اصل کابینہ عمران خان سے مشاورت کے بعد حتمی ہوگی۔
اس سے قبل سہیل آفریدی پشاور ہائی کورٹ میں حفاظتی ضمانت کے لیے پیش ہوئے جہاں عدالت نے انہیں گرفتاری سے بچاؤ کی ضمانت دیتے ہوئے پولیس کو کسی بھی مقدمے میں حراست میں نہ لینے کا حکم دیا۔
