لاہور: وزیراعلیٰ پنجاب مریم نواز شریف نے ورلڈ ڈویلپمنٹ انفارمیشن ڈے کے موقع پر کہا ہے کہ عوام میں ترقی کی ضرورت کا بڑھتا ہوا شعور ایک مثبت رجحان ہے اور پنجاب میں تیز ترین ڈویلپمنٹ کے جدید دور کا آغاز ہوچکا ہے۔ انہوں نے کہا کہ پائیدار ترقی اور مؤثر ابلاغ لوگوں کی زندگیوں میں بہتری لانے کے لیے کلیدی کردار ادا کر رہے ہیں۔
مریم نواز شریف نے کہا کہ اس دن کو منانے کا مقصد عوام کی زندگیوں میں بہتری لانے کے عزم کی تجدید ہے اور یہ عوامی مسائل اور ترقیاتی ضروریات کی اہمیت کو اجاگر کرنے کا دن ہے۔
انہوں نے بتایا کہ پنجاب میں پہلی مرتبہ تین ہزار مراکز صحت اور ہسپتالوں کی تعمیر، مرمت اور بحالی کا منصوبہ شروع کیا گیا ہے، جبکہ مختصر مدت میں 20 ہزار سے زائد سڑکوں کی تعمیر و مرمت اس عزم کی مثال ہے۔
وزیراعلیٰ نے مزید کہا کہ منصوبے جیسے ’’ستھرا پنجاب‘‘، 1100 الیکٹرو بسز اور ’’اپنی چھت، اپنا گھر‘‘ ترقیاتی ابلاغ کی روشن مثالیں ہیں، جو صحت، تعلیم اور جدید مواصلاتی سہولتوں تک عوام کی رسائی یقینی بنا کر ترقی کے اہداف حاصل کرنے میں مدد دیتے ہیں۔
انہوں نے معاشی ترقی اور مثبت تبدیلی میں عوامی معلومات کے کردار کو اجاگر کرتے ہوئے محکمہ اطلاعات کی خدمات کی تعریف کی، جو عوامی شعور بیدار کرنے میں نمایاں کردار ادا کر رہا ہے۔
