کچہری چوک میں آج سے شروع ہونے والے ترقیاتی منصوبے نے پہلے ہی دن شہر بھر کے ٹریفک نظام کو بری طرح متاثر کر دیا۔ فاؤنڈیشن یونیورسٹی، جی ٹی روڈ، اڈیالہ اور کینٹ کے ملحقہ علاقوں میں گاڑیوں کی طویل قطاریں لگ گئیں۔
حکومت کی جانب سے جاری کیے گئے متبادل راستے بھی شروع کے دن ہی شدید دباؤ کا شکار رہے اور کئی جگہوں پر مکمل طور پر بند یا جام ہو گئے، جس کے باعث اسکول و یونیورسٹی جانے والے طلباء سمیت عام شہریوں کو شدید پریشانی کا سامنا کرنا پڑا۔
شہریوں کا کہنا ہے کہ ٹریفک وارڈنز کی عدم موجودگی نے صورتحال کو مزید خراب کیا، اور کہیں بھی ٹریفک کو کنٹرول کرنے کا مؤثر انتظام نظر نہیں آیا۔
عوام نے مطالبہ کیا ہے کہ انتظامیہ فوری نوٹس لے، متبادل راستوں پر ٹریفک پولیس تعینات کرے اور ٹریفک کے بہاؤ کو برقرار رکھنے کے لیے ہنگامی اقدامات کرے، تاکہ روزمرہ زندگی مفلوج ہونے سے بچ سکے۔
