چترال کے علاقے گرم چشمہ کی منور ویلی میں معدومیت کے خطرے سے دوچار نایاب برفانی چیتے کی موجودگی دوبارہ ریکارڈ کی گئی ہے۔
محکمہ جنگلی حیات خیبرپختونخوا کے مطابق یہ نایاب جانور آبادی کے قریب دیکھا گیا، جس کے بعد علاقے میں وائلڈ لائف حکام متحرک ہو گئے ہیں۔
محکمے کے مطابق چند سال قبل بھی چترال میں برفانی چیتے کی موجودگی رپورٹ ہوئی تھی، تاہم حالیہ مشاہدہ اس کی بقا کے حوالے سے اہم پیش رفت ہے۔ چترال وائلڈ لائف ٹیمیں اس وقت علاقے میں موجود ہیں اور برفانی چیتے کے تحفظ اور اس کے محفوظ قدرتی ماحول کے لیے اقدامات کر رہی ہیں۔
محکمہ جنگلی حیات نے مقامی آبادی کو بھی احتیاطی تدابیر سے آگاہ کر دیا ہے تاکہ کسی ممکنہ ناخوشگوار صورتحال سے بچا جا سکے۔ حکام کا کہنا ہے کہ برفانی چیتے کی بقا کے لیے مقامی تعاون انتہائی اہم ہے۔
