بھارتی ریاست آسام کی اسمبلی نے ایک قانون منظور کیا ہے جس کے تحت پہلی شادی کے باوجود دوسری شادی کرنا جرم قرار پایا ہے۔ اس قانون کے تحت پہلی بیوی کی اجازت کے بغیر دوسری شادی کرنے پر 7 سال تک قید ہوسکتی ہے، اور پہلی شادی چھپانے پر سزا 10 سال تک بڑھ سکتی ہے۔
قانون میں یہ بھی شامل ہے کہ بار بار دوسری شادی کرنے پر سزا دگنی ہوگی، اور اس میں ملوث افراد کو سرکاری نوکری یا مقامی انتخابات میں حصہ لینے کی اجازت نہیں ہوگی۔ علاوہ ازیں، دوسری شادی کروانے یا اس میں معاونت کرنے والوں جیسے گاؤں کے سرپنچ، مذہبی پیشوا، والدین یا سرپرست کو دو سال قید اور ایک سے ڈیڑھ لاکھ روپے تک جرمانہ ہوسکتا ہے۔
اس قانون میں غیر قانونی شادی کی شکار خواتین کو معاوضہ اور قانونی تحفظ فراہم کرنے کی بھی شق شامل ہے۔ آسام کے وزیراعلیٰ نے کہا کہ یہ قانون اسلام مخالف نہیں بلکہ ازدواجی ذمہ داری اور خواتین کے حقوق کے تحفظ کے لیے ضروری ہے۔
تاہم، یہ قانون ذاتی آزادی اور مذہبی روایات پر قدغن کے طور پر دیکھا جا رہا ہے، خاص طور پر ان علاقوں میں جہاں دوسری شادی مذہب یا روایت کے مطابق جائز ہے۔ بعض قبائل اور خود مختار علاقوں کو جزوی استثنیٰ بھی دیا گیا ہے۔
