کراچی: وکلا نے 27 ویں آئینی ترمیم کے خلاف سندھ بھر کی عدالتوں میں ہڑتال کی، جس کے باعث عدالتی امور معطل ہو گئے اور سائلین کو شدید مشکلات کا سامنا کرنا پڑا۔
سندھ ہائی کورٹ اور سٹی کورٹ سمیت دیگر عدالتوں میں وکلا نے پیش نہیں ہو کر بائیکاٹ کیا، جبکہ ہائی کورٹ کے دائرہ اختیار پر تنازع بھی سامنے آیا۔ قائم مقام چیف جسٹس ظفر احمد راجپوت نے کاز لسٹ منسوخ کر دی اور آئینی درخواستیں صرف آئینی بینچز کے روبرو پیش کرنے کی ہدایت دی۔
کراچی بار ایسوسی ایشن نے سٹی کورٹ میں مکمل ہڑتال کی، داخلی و خارجی راستے بند کیے اور سائلین کو عدالت میں داخلے سے روک دیا۔ روزانہ کی بنیاد پر قیدیوں کی پیشی بھی متاثر ہوئی، جس کے نتیجے میں ہزاروں مقدمات کی سماعتیں ملتوی ہو گئیں۔
وکلا نے کہا کہ ہڑتال ہائی کورٹس کے دائرہ اختیار کی وضاحت اور مستعفی ہونے والے سپریم کورٹ ججز و 27 ویں ترمیم سے متعلق ہے، اور وہ جسٹس اطہر من اللہ اور جسٹس منصور علی شاہ کے ساتھ یکجہتی کا اظہار کر رہے ہیں۔
