لیبیا کے وزیراعظم عبدالحمید دبیبہ نے تصدیق کی ہے کہ ترکی کے دارالحکومت انقرہ کے قریب پیش آنے والے طیارہ حادثے میں لیبیا کے آرمی چیف آف اسٹاف لیفٹیننٹ جنرل محمد علی الحداد سمیت کئی اعلیٰ عسکری حکام جاں بحق ہو گئے ہیں۔
وزیراعظم نے سوشل میڈیا پر جاری بیان میں کہا کہ یہ افسوسناک خبر انتہائی دکھ اور صدمے کے ساتھ موصول ہوئی۔ ان کے مطابق حادثے میں آرمی چیف کے علاوہ بری افواج کے چیف آف اسٹاف، ملٹری مینوفیکچرنگ اتھارٹی کے سربراہ، آرمی چیف کے مشیر اور میڈیا آفس کے فوٹوگرافر بھی جان کی بازی ہار گئے۔
عبدالحمید دبیبہ نے بتایا کہ یہ حادثہ ترکی کے سرکاری دورے کے بعد واپسی کے دوران پیش آیا۔ انہوں نے جاں بحق افراد کو ملک اور مسلح افواج کے لیے بڑا نقصان قرار دیتے ہوئے اہلِ خانہ، فوجی ساتھیوں اور لیبیا کے عوام سے تعزیت کا اظہار کیا۔
دوسری جانب ترکی کے وزیر داخلہ علی یرلیکایا نے بتایا کہ لیبیا جانے والا نجی طیارہ انقرہ کے ضلع حایمانا میں گر کر تباہ ہوا، جس کا ملبہ برآمد کر لیا گیا ہے۔
