امریکی فوج کی ریاستہائے متحدہ کی مرکزی کمان نے اعلان کیا ہے کہ ایران کے ساتھ جاری جنگ کے دوران 3 امریکی فوجی ہلاک جبکہ 5 شدید زخمی ہوگئے ہیں۔
ایران کے ساتھ امریکی اور اسرائیلی جنگ میں یہ امریکی ہلاکتوں کی پہلی باضابطہ اطلاع ہے۔ سینٹرل کمانڈ نے ہلاک اور زخمی ہونے والے اہلکاروں کے بارے میں مزید تفصیلات جاری نہیں کیں۔
سینٹ کام کے مطابق چند دیگر اہلکار معمولی زخمی بھی ہوئے ہیں، جن میں شیل کے ٹکڑوں سے لگنے والی چوٹیں شامل ہیں۔ بیان میں کہا گیا ہے کہ ایسے زخمی اہلکاروں کو طبی امداد فراہم کرنے کے بعد دوبارہ ڈیوٹی پر واپس لانے کا عمل جاری ہے۔
یاد رہے کہ گزشتہ روز ایران نے مشرقِ وسطیٰ میں موجود امریکی فوجی تنصیبات کو بیلسٹک میزائلوں اور ڈرونز کے ذریعے نشانہ بنانے کا دعویٰ کیا تھا، جس کے بعد خطے میں کشیدگی مزید بڑھ گئی ہے۔
