اسلام آباد: وزیراعلیٰ بلوچستان سرفراز بگٹی نے کہا ہے کہ سیکیورٹی اداروں نے یومِ آزادی پر دہشت گردانہ حملہ ناکام بناتے ہوئے ایک مبینہ خودکش بمبار کو گرفتار کر لیا ہے۔
کوئٹہ میں پریس کانفرنس کرتے ہوئے انہوں نے بتایا کہ 14 اگست کو حملہ آوروں نے جشنِ آزادی منانے والے معصوم شہریوں کو نشانہ بنانا تھا تاہم بروقت کارروائی سے صوبے کو بڑی تباہی سے بچا لیا گیا۔
وزیراعلیٰ نے سیکیورٹی اداروں، پولیس اور انسدادِ دہشت گردی کے محکمے کی کارکردگی کو سراہا اور گرفتار مبینہ خودکش بمبار کا اعترافی ویڈیو بیان بھی جاری کیا۔ گرفتار شخص گریڈ 18 کا لیکچرر ہے جس نے پی ایچ ڈی پشاور یونیورسٹی سے کی اور اس کی بیوی بھی سرکاری ملازم ہے۔
بگٹی نے انکشاف کیا کہ مذکورہ لیکچرر گزشتہ برس نومبر میں کوئٹہ ریلوے اسٹیشن دھماکے میں سہولت کاری میں بھی ملوث رہا، جس میں 32 افراد جاں بحق اور 50 سے زائد زخمی ہوئے تھے۔
انہوں نے کہا کہ یہ دعویٰ غلط ہے کہ دہشت گردی میں ملوث افراد محرومی کا شکار ہوتے ہیں، کیونکہ گرفتار شخص اور اس کا خاندان تعلیم اور ملازمتوں کے ذریعے بہتر زندگی گزار رہا تھا۔
لیکچرر نے اپنے ویڈیو بیان میں ریاست سے غداری کا اعتراف کیا اور کہا کہ نوجوانوں کو انتہا پسند گروہوں سے دور رہنا چاہیے۔
