اسلام آباد: پلاننگ کمیشن نے پاکستان کی پہلی ڈیجیٹل اقتصادی شماری کے ڈیٹا کا اعلان کیا ہے، جس کے مطابق ملک میں کل 71 لاکھ 4 ہزار کاروبار ہیں اور ان میں کام کرنے والے افراد کی تعداد 2 کروڑ 53 لاکھ 44 ہزار 121 ہے۔ صوبوں کے مطابق کاروبار اور ورک فورس کی تفصیل یوں ہے: پنجاب میں 43 لاکھ کاروبار اور 1 کروڑ 36 لاکھ ورک فورس، سندھ میں 13 لاکھ کاروبار اور 57 لاکھ ورک فورس، خیبر پختونخوا میں 10 لاکھ کاروبار اور 39 لاکھ ورک فورس، بلوچستان میں 3 لاکھ کاروبار اور 13 لاکھ ورک فورس، جبکہ اسلام آباد میں 86 ہزار کاروبار اور 6 لاکھ ورک فورس ہیں۔
رپورٹ میں مزید بتایا گیا ہے کہ پاکستان میں 27 لاکھ 79 ہزار ریٹیل دکانیں، 1 لاکھ 88 ہزار ہول سیل دکانیں، 8 لاکھ 25 ہزار سروسز دکانیں، 2 لاکھ 56 ہزار ہوٹلز اور 1 لاکھ 19 ہزار اسپتال ہیں۔ ملک میں 11 لاکھ رہائشی و معاشی عمارات، 3 کروڑ 4 لاکھ رہائشی عمارتیں، 51 لاکھ معاشی عمارات اور 5 لاکھ 30 ہزار جھگی، خیمے یا غاروں میں رہائشیں موجود ہیں۔ تعلیمی اداروں میں 2 لاکھ 42 ہزار اسکولز، 11 ہزار 568 کالجز، 214 یونیورسٹیاں اور 36 ہزار 331 مدارس شامل ہیں۔ یہ شماری پاکستان کی پہلی ڈیجیٹل شماری اور 2023 کی ساتویں خانہ و مردم شماری کے ساتھ ملا کر کی گئی ہے، جو ملک میں اقتصادی منصوبہ بندی کے لیے ایک اہم اقدام ہے۔
