سوات اور گردونواح میں آج تیسری دفعہ زلزلے کے جھٹکے محسوس کیے گئے۔ زلزلہ پیما مرکز کے مطابق زلزلے کی شدت 4.1 تھی، مرکز کوہ ہندوکش کے پہاڑی سلسلے میں تھا اور زیر زمین گہرائی 236 کلومیٹر ریکارڈ کی گئی۔
زلزلے کے جھٹکے خیبرپختونخوا کے ضلع پشاور، صوابی، ملاکنڈ اور مہمند شہر سمیت گردونواح میں بھی محسوس کیے گئے، جس سے شہریوں میں خوف و ہراس پھیل گیا اور لوگ گھروں سے باہر نکل آئے۔ تاحال کسی قسم کے جانی یا مالی نقصان کی اطلاع نہیں ملی، جبکہ مقامی انتظامیہ اور ریسکیو ادارے صورت حال پر نظر رکھے ہوئے ہیں اور ہنگامی صورتحال سے نمٹنے کے لیے تیار ہیں۔
