پاکستان پیپلزپارٹی کے چیئرمین بلاول بھٹو زرداری نے وفاقی حکومت سے سیلاب متاثرین کی مدد کے لیے فوری طور پر بین الاقوامی اداروں سے امداد کی اپیل کرنے کا مطالبہ کر دیا۔ انہوں نے کہا کہ بین الاقوامی امداد کی اپیل نہ کرنے سے کروڑوں متاثرہ پاکستانی اس امداد سے محروم رہ جائیں گے۔
بلاول بھٹو نے وفاقی حکومت کی جانب سے ماحولیاتی اور زرعی ایمرجنسی کے اعلان کا خیرمقدم کرتے ہوئے افسوس کا اظہار کیا کہ گلگت بلتستان، خیبرپختونخوا، پنجاب اور جنوبی پنجاب کے متاثرہ اضلاع کے لیے بینظیر انکم سپورٹ پروگرام کے تحت ریلیف کا اعلان ابھی تک نہیں کیا گیا۔ انہوں نے کہا کہ بین الاقوامی امداد کی اپیل میں تاخیر ناقابل فہم ہے، کیونکہ دنیا بھر میں ایسی آفات کے دوران فوری امداد کی اپیل معمول کی پریکٹس ہے، جیسا کہ 2022 کے سیلاب کے دوران کیا گیا تھا۔
