وفاقی دارالحکومت میں ٹریفک پولیس نے شہریوں کو یکم اکتوبر تک ڈرائیونگ لائسنس بنوانے کی ڈیڈ لائن دے دی۔ چیف ٹریفک آفیسر (سی ٹی او) اسلام آباد حمزہ ہمایوں کے مطابق ڈیڈ لائن کے بعد بغیر لائسنس گاڑی چلانے والوں کے خلاف سخت کارروائی کی جائے گی۔
سی ٹی او نے واضح کیا کہ بغیر لائسنس ڈرائیورز کے خلاف مقدمہ درج ہوگا، گرفتاری بھی عمل میں لائی جائے گی اور ان کی گاڑی بند کر دی جائے گی۔ شہریوں کو فیض آباد، ایف-6 سہولت مرکز اور ٹریفک سہولت وینز سے لائسنس بنوانے کی سہولت فراہم کی جا رہی ہے۔
حمزہ ہمایوں نے کہا کہ ڈرائیونگ لائسنس کی صرف فزیکل کاپی قابل قبول ہوگی، ڈیجیٹل کاپی کو تسلیم نہیں کیا جائے گا۔ ان کے مطابق، بغیر لائسنس گاڑی چلانا نہ صرف قانون کی خلاف ورزی ہے بلکہ اپنی اور دوسروں کی جان کے لیے خطرہ بھی ہے، اور ٹریفک پولیس کسی کو بھی ایسی لاپرواہی کی اجازت نہیں دے گی۔
