وزیر اطلاعات پنجاب عظمیٰ بخاری نے کہا ہے کہ 9 مئی کے واقعات میں ملوث کرنے والے اور کرانے والے کسی معافی کے مستحق نہیں ہیں۔ انہوں نے اس ناکام بغاوت کو سیاسی لبادے میں چھپنے والے کرداروں کی جانب اشارہ کرتے ہوئے کہا کہ تمام شواہد منظر عام پر آچکے ہیں اور مرتکب افراد چھپ نہیں سکتے۔
عظمیٰ بخاری نے کہا کہ نو مئی کے حملوں میں ریاست پر حملہ اور شہداء کے مجسمے جلانے سے قوم کی خدمت نہیں ہوئی بلکہ دنیا بھر میں پاکستان کی جگ ہنسائی ہوئی۔ ان کا کہنا تھا کہ اب یہ کردار انتقامی سیاست کے نام پر مظلوم نہیں بن سکتے اور قوم ماسٹر مائنڈ اور سہولت کاروں کا مکمل احتساب چاہتی ہے۔
وزیر اطلاعات نے مزید کہا کہ مقبولیت فرعون یا شیطان کو بھی حاصل ہو سکتی ہے لیکن وہ فرشتے نہیں بن سکتے۔ نو مئی کے ماسٹر مائنڈ کی تمام کوششیں ناکام ہو چکی ہیں اور اب اسے اپنے گناہوں کا حساب دینے کا وقت ہے۔
