لاہور: پنجاب کی وزیر اطلاعات عظمیٰ بخاری نے پریس کانفرنس میں کہا ہے کہ کسی غیر قانونی ہاؤسنگ سوسائٹی کو این او سی نہیں دیا گیا، اور راوی اربن ڈویلپمنٹ اتھارٹی کے سی ای او نے بھی اس بات کی تصدیق کی۔ ان کا کہنا تھا کہ پنجاب میں دریائے راوی، ستلج اور چناب کا موجودہ سیلاب 1988 کے سیلاب سے کہیں زیادہ شدید ہے، اور اب تک 35 افراد جاں بحق ہو چکے ہیں۔
عظمیٰ بخاری نے بتایا کہ ملکی تاریخ کا سب سے بڑا ریسکیو آپریشن جاری ہے، جس میں 8 لاکھ 57 ہزار افراد اور 2 لاکھ 38 ہزار جانور ریسکیو کیے جا چکے ہیں، جبکہ 151 فلڈ کیمپس قائم کیے گئے ہیں اور کشتیوں کے ذریعے خشک راشن فراہم کیا جا رہا ہے۔ انہوں نے کہا کہ مستقبل میں چھوٹے اور بڑے ڈیمز بنانے کی ضرورت ہے، پنجاب حکومت سیلاب متاثرین کی بحالی تک ان کا ساتھ دے گی، اور اشیائے خورونوش کی قیمتیں قابو میں رکھنے کے لیے خصوصی اقدامات اور ذخیرہ اندوزوں کے خلاف سخت کارروائیاں کی جائیں گی۔
