یورپ کے مختلف شہروں میں اسرائیلی افواج کے گلوبل صمود فلوٹیلا پر حملے کے بعد بڑے احتجاجی مظاہرے شروع ہو گئے۔ مظاہروں میں فلسطین کے حامی کارکن، طلبہ اور یونینز کے ارکان شریک ہوئے۔
اطالوی دارالحکومت روم میں سیکڑوں مظاہرین ٹرمنی اسٹیشن کے سامنے جمع ہوئے اور اسرائیل کے خلاف نعرے لگائے، فلسطینی عوام سے یکجہتی کا اظہار کیا اور امدادی قافلے پر حملے کو بین الاقوامی قوانین کی خلاف ورزی قرار دیا۔
اسی طرح اسپین کے شہر بارسلونا میں بھی سیکڑوں افراد نے اسرائیلی قونصلیٹ کے باہر احتجاج کیا اور غزہ کے عوام کے ساتھ حمایت کا اعلان کیا۔ جرمنی کے برلن میں مرکزی ریلوے اسٹیشن کے باہر درجنوں افراد نے مظاہرہ کیا، جبکہ بیلجیم کے دارالحکومت برسلز میں ریلی نکالی گئی جو پلاس دی لا بورس سے بیلجین وزارتِ خارجہ تک گئی۔
مظاہرین کا کہنا تھا کہ اسرائیلی حملہ انسانی ہمدردی کی کوششوں پر کھلا حملہ ہے اور عالمی برادری کو فلسطینی عوام کی مدد کے لیے فوری اقدام کرنا چاہیے۔
