اٹلی کے علاقے ویرونا کے قریب کاسٹیل ڈیزانو میں رات گئے ایک گھر میں دھماکے سے تین پولیس اہلکار جاں بحق اور 12 اہلکاروں سمیت ایک شہری زخمی ہوگیا۔
ابتدائی معلومات کے مطابق گھر گیس سے بھرا ہوا تھا اور جب کارروائی کے دوران مرکزی دروازہ کھولا گیا تو زور دار دھماکہ ہوا۔ پولیس تین بہن بھائیوں کو بے دخل کرنے پہنچی تھی جنہوں نے پہلے خود کو دھماکے سے اڑانے کی دھمکی دے رکھی تھی۔
اطالوی نیوز ایجنسی اے این ایس اے کے مطابق دو بہن بھائی، جن کی عمریں تقریباً 60 سال ہیں، کو گرفتار کر لیا گیا ہے جبکہ تیسرا فرد فرار ہے۔
وزیر اعظم جارجیا میلونی نے ہلاک ہونے والے اہلکاروں کو خراجِ عقیدت پیش کیا اور واقعے کی پیش رفت پر نظر رکھنے کی بات کی۔ فائر فائٹرز کے مطابق زخمیوں میں 12 قانون نافذ کرنے والے اہلکار اور ایک خاتون شامل ہیں۔
