امریکا کے شدید دباؤ اور بھاری ٹیرف کے بعد بھارت نے روس سے تیل کی خریداری میں نمایاں کمی کر دی ہے۔ وائٹ ہاؤس کے حکام نے برطانوی خبر رساں ادارے رائٹرز سے بات کرتے ہوئے بتایا کہ بھارتی ریفائنریوں نے روس سے تیل کی درآمدات میں پہلے ہی سے 50 فیصد کمی کی ہے۔
وائٹ ہاؤس کے مطابق امریکا اور بھارت کے درمیان تجارتی مذاکرات تعمیری اور مفید رہے، جس کے نتیجے میں بھارت نے روسی تیل کی خریداری کم کرنے کا فیصلہ کیا۔ تاہم، بھارت مستقبل میں مکمل طور پر روس سے تیل کی خریداری روک پائے گا یا نہیں، اس حوالے سے امریکی حکام نے مزید تفصیلات فراہم نہیں کیں۔
گذشتہ روز امریکی صدر نے اوول آفس میں میڈیا سے گفتگو کرتے ہوئے کہا تھا کہ بھارتی وزیراعظم نریندر مودی نے انہیں روس سے تیل نہ خریدنے کی یقین دہانی کرائی ہے۔ صدر ٹرمپ نے بتایا کہ وہ بھارت کی جانب سے روسی تیل کی خریداری پر خوش نہیں تھے، لیکن اب یہ معاملہ طے ہو گیا ہے۔
صدر ٹرمپ نے مزید کہا کہ بھارت فوری طور پر روس سے تیل خریداری روک نہیں سکتا، لیکن جلد ہی یہ اقدام کرے گا۔ دوسری جانب بھارت کی وزارت خارجہ نے اس حوالے سے مودی اور ٹرمپ کے درمیان بات چیت کی تردید کر دی ہے۔
