راولپنڈی: چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے بنگلہ دیش کا دورہ کیا، جہاں انہوں نے عبوری سربراہ محمد یونس سمیت سیاسی اور عسکری قیادت سے ملاقاتیں کیں۔
آئی ایس پی آر کے مطابق جنرل ساحر شمشاد مرزا نے بنگلہ دیش کے چیف ایڈوائزر محمد یونس، بحریہ کے سربراہ ایڈمرل محمد نظم الحسن، فضائیہ کے سربراہ ائیر چیف مارشل حسن محمود خان اور مسلح افواج ڈویژن کے پرنسپل اسٹاف آفیسر لیفٹیننٹ جنرل ایس ایم قمر الحسن سے الگ الگ ملاقاتیں کیں۔
ملاقاتوں میں علاقائی اور عالمی صورتحال، دفاعی تعاون، اور سلامتی کے امور پر تبادلہ خیال کیا گیا۔ دونوں ممالک نے دفاع اور سکیورٹی کے شعبوں میں تعاون کو مزید فروغ دینے پر اتفاق کیا۔
جنرل ساحر شمشاد مرزا نے بنگلہ دیش کے ساتھ تعلقات کو مضبوط بنانے کی پاکستان کی خواہش کا اعادہ کیا اور کہا کہ دونوں ممالک کے تعلقات باہمی احترام اور خودمختاری کی بنیاد پر مزید مستحکم کیے جائیں گے۔
بنگلہ دیش کی عسکری و سیاسی قیادت نے پاکستان کی مسلح افواج کی پیشہ ورانہ صلاحیتوں، دہشتگردی کے خلاف جنگ میں قربانیوں اور کامیابیوں کو سراہا۔
دورے کے دوران جنرل ساحر شمشاد مرزا نے سلہٹ میں انفنٹری اینڈ ٹیکٹکس اسکول کا بھی دورہ کیا، جہاں انہوں نے اساتذہ اور طلبہ سے ملاقات کی۔ سیناکنجو پہنچنے پر چاق و چوبند دستے نے انہیں سلامی پیش کی، جبکہ انہوں نے شیکھا آنیربن پر پھول بھی چڑھائے۔
