لاہور میں جنوبی افریقا کے خلاف دوسرے ٹی ٹوئنٹی میں بابر اعظم نے نیا سنگِ میل عبور کرتے ہوئے روہت شرما کا ٹی ٹوئنٹی انٹرنیشنل میں سب سے زیادہ رنز بنانے کا ریکارڈ توڑ دیا۔ بابر کو یہ اعزاز حاصل کرنے کے لیے صرف 9 رنز درکار تھے، جو انہوں نے اپنی اننگز کے آغاز میں ہی مکمل کر لیے۔ اس سے قبل روہت شرما 159 میچوں میں 4231 رنز کے ساتھ سرفہرست تھے۔
بابر اعظم گزشتہ سال جنوبی افریقا کے خلاف سیریز کے بعد مختصر فارمیٹ کی ٹیم سے باہر ہو گئے تھے، تاہم ایشیا کپ میں ناکامی کے بعد انہیں دوبارہ ٹی ٹوئنٹی اسکواڈ میں شامل کیا گیا، جہاں واپسی کے ساتھ ہی انہوں نے بڑا ریکارڈ اپنے نام کر لیا۔
