روسی وزیرِ خارجہ سرگئی لاوروف نے تصدیق کی ہے کہ صدر ولادیمیر پیوٹن کے حکم پر ممکنہ جوہری تجربے کی تیاری شروع کر دی گئی ہے۔ لاوروف کے مطابق 5 نومبر کو سلامتی کونسل کے اجلاس میں یہ ہدایت دی گئی تھی اور نتائج سے عوام کو آگاہ کیا جائے گا۔
یہ حکم امریکی صدر ڈونلڈ ٹرمپ کے اعلان کے بعد آیا، جس میں انہوں نے امریکہ کی جانب سے جوہری تجربات دوبارہ شروع کرنے کا عندیہ دیا تھا۔ لاوروف نے کہا کہ روس کو اس حوالے سے امریکہ کی جانب سے کوئی وضاحت موصول نہیں ہوئی۔
امریکی صدر ٹرمپ نے 31 اکتوبر کو اعلان کیا تھا کہ امریکہ 33 سال بعد دوبارہ جوہری تجربات کرے گا، لیکن یہ واضح نہیں کیا کہ یہ زیرِ زمین تجربات ہوں گے یا دیگر قسم کے۔
ٹرمپ نے ایئر فورس ون میں کہا کہ امریکی فوج کو جوہری ہتھیاروں کی ٹیسٹنگ فوراً شروع کرنے کا حکم دے دیا گیا ہے، جو چین اور روس کے لیے سخت پیغام ہے۔
روسی اور امریکی تعلقات حالیہ ہفتوں میں شدید کشیدگی کا شکار ہیں، اور ٹرمپ نے یوکرین جنگ میں ناکامی پر پیوٹن سے سربراہی اجلاس منسوخ کر دیا ہے جبکہ روس پر نئی پابندیاں بھی عائد کی گئی ہیں۔
