اسلام آباد میں اردن کے شاہ عبداللہ دوم کے ظہرانے کے موقع پر ایوانِ صدر میں میڈیا سے غیر رسمی گفتگو کرتے ہوئے فیلڈ مارشل سید عاصم منیر نے کہا کہ بھارت کے خلاف جنگ میں اللہ نے پاکستان کو سر بلند کیا۔
انہوں نے کہا کہ پاکستان ایک امن پسند ملک ہے، تاہم اگر کسی نے جنگ مسلط کی تو جواب اسی انداز میں دیا جائے گا جیسا مئی میں دیا گیا تھا۔ انہوں نے مزید کہا کہ وہ اللہ کے حکم اور اُس کے فرمان کے مطابق اپنے فرائض انجام دیتے ہیں۔
گفتگو کے دوران فیلڈ مارشل نے غزوۂ اُحد کا حوالہ دیا اور کہا کہ جب مسلمان اللہ پر بھروسہ کرتا ہے تو اللہ دشمن پر پھینکی گئی مٹی کو بھی میزائل بنا دیتا ہے۔
ادھر صدرِ مملکت آصف علی زرداری اور فیلڈ مارشل سید عاصم منیر کے درمیان بھی طویل گفتگو ہوئی۔ اس موقع پر بلاول بھٹو زرداری، آصفہ بھٹو، برطانوی ہائی کمشنر اور امریکی سفیر بھی موجود تھے۔
