آزاد جموں و کشمیر (اے جے کے) کے نومنتخب وزیراعظم راجہ فیصل ممتاز راٹھور نے منگل کے روز اپنے عہدے کا حلف اٹھا لیا۔ حلف برداری کی یہ تقریب مظفرآباد میں ایوانِ صدر میں منعقد ہوئی، جہاں اسپیکر قانون ساز اسمبلی چوہدری لطیف اکبر نے ان سے حلف لیا۔ اسپیکر نے یہ ذمہ داری صدر بیرسٹر سلطان محمود کی عدم موجودگی میں ادا کی، جو مبینہ طور پر صحت کے باعث علاقائی دارالحکومت کا سفر نہ کرسکے۔
راٹھور نے گزشتہ روز اس وقت کامیابی حاصل کی تھی جب چوہدری انوار الحق کو قانون ساز اسمبلی میں عدم اعتماد کی تحریک کے ذریعے منصب سے ہٹا دیا گیا۔ آئین کے مطابق عدم اعتماد کی تحریک نئے امیدوار کے حق میں ووٹ تصور ہوتی ہے۔
حلف اٹھانے کے بعد اپنے خطاب میں نئے وزیراعظم نے کہا کہ وہ اس بھاری ذمہ داری پر اللہ کے شکر گزار ہیں اور عوامی خدمت کو اولین ترجیح بنائیں گے۔
وزیراعظم پاکستان شہباز شریف نے بھی ٹیلی فونک رابطے میں راٹھور کو وزارتِ عظمیٰ سنبھالنے پر مبارکباد دیتے ہوئے یقین دلایا کہ وفاقی حکومت آزاد جموں و کشمیر کی ترقی، خوشحالی اور عوامی بہبود کے لیے ہر ممکن تعاون فراہم کرے گی۔
راجہ فیصل ممتاز راٹھور گزشتہ چار سال میں اے جے کے کے چوتھے جبکہ 1975 میں پارلیمانی نظام کے نفاذ کے بعد 16ویں وزیراعظم ہیں۔
اپنی جیت کے بعد راٹھور نے متعدد انتظامی اصلاحات کا اعلان کیا، جن میں سرکاری اخراجات میں کمی، نئی ٹرانسپورٹ پالیسی، سیکریٹریوں کی تعداد 20 تک محدود کرنا، عوامی مسائل کے حل کے لیے فوری اقدامات، اور کم تنخواہ والے عملے کی ضروریات پوری کرنے کے اعلانات شامل ہیں۔
