کراچی کے علاقے بلدیہ ٹاؤن کی مشرف کالونی میں گھر کے اندر فائرنگ کے واقعے میں خاتون سمیت تین افراد جاں بحق جبکہ ایک خاتون شدید زخمی ہوگئی۔
ریسکیو حکام کے مطابق جاں بحق افراد اور زخمی خاتون کو فوری طور پر قریبی اسپتال منتقل کر دیا گیا، جہاں زخمی کی حالت تشویشناک بتائی جا رہی ہے۔
اطلاع ملتے ہی پولیس کی بھاری نفری موقع پر پہنچ گئی اور علاقے کو گھیرے میں لے کر شواہد اکٹھے کرنا شروع کر دیے۔ ابتدائی تحقیقات کے مطابق واقعہ بظاہر ذاتی دشمنی کا نتیجہ معلوم ہوتا ہے، تاہم پولیس کا کہنا ہے کہ حتمی رائے مکمل تحقیقات کے بعد ہی دی جا سکے گی۔
جاں بحق ہونے والوں کی شناخت 60 سالہ عابد علی، 50 سالہ مریم اور 20 سالہ زوہیب کے ناموں سے ہوئی ہے، جبکہ زخمی خاتون کی شناخت 35 سالہ فاطمہ کے نام سے کی گئی ہے۔
پولیس حکام کے مطابق کرائم سین یونٹ کو جائے وقوعہ پر طلب کر لیا گیا ہے اور واقعے کے تمام پہلوؤں سے تفتیش جاری ہے۔
