مشترکہ گرینڈ الائنس تشکیل، فضل الرحمان سے محمود اچکزئی کی ملاقات جلد

مولانا فضل الرحمان پہلے ہی حکومت کی مخالفت کرنے پر آمادگی کا اشارہ دے چکے ہیں، جس سے اچکزئی کی قیادت میں پی ٹی آئی اور جے یو آئی کو آئندہ احتجاجی مظاہروں کا اعلان کرنے کی راہ ہموار ہوگئی ہے۔اچکزئی کی مشترکہ قیادت میں پی ٹی آئی اور جے یو آئی (ف) کے قریبی تعاون کی توقع ہے، جس میں جماعت اسلامی کے اتحاد میں اہم کردار حاصل کرنے کا امکان ہے۔اس اتحاد کی بنیاد پانچ اپوزیشن جماعتوں کے اہم اجلاس کے دوران رکھی گئی جس میں جماعت اسلامی سے تعلق رکھنے والے لیاقت بلوچ، پشتونخوا میپ کے سربراہ محمود خان اچکزئی، بلوچستان نیشنل پارٹی کے اختر مینگل، پی ٹی آئی کے چیئرمین بیرسٹر گوہر علی خان اور مجلس وحدت المسلمین (ایم ڈبلیو ایم) کے چیئرمین علامہ راجہ ناصر عباس سمیت اہم شخصیات نے شرکت کی۔اجلاس میں پی ٹی آئی کے اسد قیصر اور قومی اسمبلی میں قائد حزب اختلاف عمر ایوب خان بھی موجود تھے۔ اس اجتماع کے دوران اپوزیشن اتحاد کی تشکیل سے متعلق اہم امور پر تبادلہ خیال کیا گیا ، جس کے نتیجے میں اہم فیصلے کیے گئے۔