مائیکروسافٹ کے بانی بل گیٹس کی بل اینڈ میلنڈا گیٹس فاؤنڈیشن نے پاکستان میں حالیہ بارشوں اور سیلاب سے متاثرہ خاندانوں کی مدد کے لیے 10 لاکھ ڈالر کی ہنگامی امداد دینے کا اعلان کیا ہے۔
یہ امداد عالمی ادارہ صحت (ڈبلیو ایچ او) کے ذریعے فراہم کی جائے گی تاکہ ملک کے چاروں صوبوں کے 33 متاثرہ اضلاع میں موجود 4 لاکھ 65 ہزار متاثرین کو فوری طبی سہولتیں فراہم کی جا سکیں۔
پاکستان میں ڈبلیو ایچ او کے نمائندے ڈاکٹر ڈپینگ لو نے ضلع صوابی کا دورہ کیا اور متاثرہ علاقوں میں صحت کی صورتحال کا جائزہ لیا۔ اس موقع پر انہوں نے کہا کہ گیٹس فاؤنڈیشن کی بروقت امداد متاثرین کے لیے نہایت اہم ہے اور ڈبلیو ایچ او انسانی جانوں کے تحفظ کے لیے پاکستان کے ساتھ کھڑا ہے۔
ڈاکٹر ڈپینگ لو نے مزید کہا کہ ماحولیاتی تبدیلی کے باعث مون سون کی بارشیں زیادہ شدت اختیار کر رہی ہیں جس سے قدرتی آفات میں بھی اضافہ ہورہا ہے۔
