تل ابیب میں اسرائیلی فوج کے سربراہ لیفٹیننٹ جنرل ایال زمیر نے کہا ہے کہ حماس کی مکمل شکست کے بغیر جنگ ختم نہیں ہوگی اور اس کے لیے غزہ پر بڑے فوجی آپریشن کی تیاریاں کی جا رہی ہیں۔ نخشونیم بیس پر فوجی اہلکاروں سے خطاب میں انہوں نے بتایا کہ برّی کارروائیوں میں اسرائیلی فوج ایسے علاقوں میں داخل ہو رہی ہے جہاں پہلے کبھی نہیں پہنچی، اور دشمن کے ہر سطح کے کارکنان کو نشانہ بنایا جا رہا ہے۔
اس موقع پر زمیر نے ریزروسٹ فوجیوں کو تشدد پر اکساتے ہوئے کہا کہ اسرائیلی عوام ان کی قربانیوں کو قدر کی نگاہ سے دیکھتے ہیں۔ دوسری جانب، اسرائیلی فوج کے عربی ترجمان اویخائے ادرعی نے غزہ کے شہریوں کو شمالی علاقوں سے جنوبی ساحلی علاقے المَواسی منتقل ہونے کی ہدایت دی ہے، تاہم رپورٹس کے مطابق دس لاکھ آبادی میں سے صرف دس ہزار شہری ہی منتقل ہوئے ہیں۔
