دبئی: ایشیا کپ سپر فور کے اہم میچ میں پاکستان اور بھارت ایک بار پھر مد مقابل ہیں، جہاں بھارتی کپتان سوریا کمار یادیو نے پچھلے میچ کی اپنی متنازع حرکت دہرا دی۔
دبئی کے اسٹیڈیم میں ٹاس کے موقع پر سب کی نظریں جمی ہوئی تھیں کہ بھارتی کپتان اسپورٹس مین اسپرٹ دکھائیں گے یا پرانی عادت پر قائم رہیں گے۔ میچ ریفری اینڈی پائیکرافٹ اور بھارت کے سابق کرکٹر روی شاستری کی موجودگی میں ٹاس ہوا، اور سوریا کمار یادیو نے ٹاس جیت کر پہلے فیلڈنگ کا فیصلہ سناتے ہوئے پاکستانی کپتان سلمان آغا سے ہاتھ نہ ملایا۔
یاد رہے کہ سوریا کمار یادیو نے 14 ستمبر کو گروپ میچ میں بھی ہاتھ نہ ملانے کا واقعہ دہرایا تھا، جس کے بعد بڑا تنازع کھڑا ہوا تھا اور میچ ریفری بھی اس معاملے میں تنقید کی زد میں آئے تھے۔
پاکستان کرکٹ بورڈ (پی سی بی) نے میچ ریفری اینڈی پائیکرافٹ کی جانب سے پاکستانی کپتان کو بھارتی کپتان سے ہاتھ ملانے سے منع کرنے پر انٹرنیشنل کرکٹ کونسل (آئی سی سی) سے احتجاج کیا تھا۔ بعد ازاں اینڈی پائیکرافٹ نے معذرت کی، جسے پی سی بی نے قبول کیا اور پاکستان نے متحدہ عرب امارات میں میچ کھیلا۔
