پاکستان تحریک انصاف کے بانی عمران خان کی بہن علیمہ خان نے دعویٰ کیا ہے کہ خیبرپختونخوا کے وزیراعلیٰ علی امین گنڈاپور نے اڈیالہ جیل میں عمران خان سے ملاقات کے دوران ان کے خلاف الزامات عائد کیے ہیں۔
اڈیالہ جیل کے قریب میڈیا سے گفتگو میں ایک سوال کے جواب میں علیمہ خان نے کہا کہ علی امین گنڈاپور نے عمران خان کو بتایا ہے کہ وہ ایجنسیوں کی سہولت کاری کر رہی ہیں اور پارٹی چیئرمین بھی بننا چاہتی ہیں۔
انہوں نے مزید کہا کہ علی امین گنڈاپور نے یہ بھی الزام لگایا کہ سوشل میڈیا کو وہ کنٹرول کر رہی ہیں۔
علیمہ خان نے واضح کیا کہ پارٹی کے چیئرمین عمران خان ہیں اور ان کے بھائی ہی پارٹی چیئرمین رہیں گے۔
