اسلام آباد: وزیراعظم شہباز شریف نے کہا ہے کہ حکومت آئندہ بجٹ میں عوام کو زیادہ سے زیادہ ریلیف فراہم کرنے کے لیے مختلف اقدامات شامل کر رہی ہے، جبکہ کاروبار دوست پالیسیوں کے تسلسل سے ملکی معیشت کو مزید مستحکم بنایا جائے گا۔
وزیراعظم سے ملک کے معروف صنعتکاروں اور کاروباری شخصیات کے وفد نے ملاقات کی، جس میں معیشت، سرمایہ کاری، برآمدات اور آئندہ مالی سال کے بجٹ سے متعلق امور پر تبادلہ خیال کیا گیا۔
ملاقات کے دوران وزیراعظم شہباز شریف نے کہا کہ کاروباری برادری پاکستان کی معیشت میں ریڑھ کی ہڈی کی حیثیت رکھتی ہے اور دنیا بھر میں ملک کا مثبت تشخص اجاگر کر رہی ہے۔ انہوں نے مشکل معاشی حالات میں حکومت کا ساتھ دینے پر صنعتکاروں اور سرمایہ کاروں کا شکریہ بھی ادا کیا۔
وزیراعظم کا کہنا تھا کہ حکومت اور نجی شعبے کے درمیان مضبوط تعاون ہی پائیدار معاشی ترقی کی بنیاد ہے، اسی لیے معاشی پالیسیوں کی تشکیل میں کاروباری برادری کی آرا کو اہمیت دی جا رہی ہے۔
انہوں نے کہا کہ برآمدات میں اضافے اور صنعتی پیداوار کے فروغ کے لیے اقدامات جاری ہیں، جبکہ غیر رسمی معیشت کو ٹیکس نیٹ میں لانے کے لیے بھی مؤثر حکمت عملی پر کام ہو رہا ہے۔
شہباز شریف نے مزید کہا کہ حکومت ایسی صنعتوں کی حوصلہ افزائی کر رہی ہے جو روزگار کے مواقع پیدا کرنے کے ساتھ ملکی پیداوار اور برآمدات میں اضافہ کریں، جبکہ عوامی فلاح اور معاشی استحکام کو بجٹ کا مرکزی محور بنایا جا رہا ہے۔
