اسلام آباد(طلوع نیوز)سپیکر قومی اسمبلی راجہ پرویز اشرف نے پنجاب کابینہ کی جانب سے پنجاب یونیورسٹی پوٹھوہار کیمپس گوجر خان کے قیام کے لیے 800 کنال زمین کی منظوری پر گوجر خان کی عوام کو مبارکباد پیش کی ہے۔
پنجاب یونیورسٹی پوٹھوہار کیمپس گوجر خان کا یہ منصوبہ 3 سال کی مدت میں مکمل ہو گا۔اسپیکر قومی اسمبلی بہت جلد پنجاب یونیورسٹی پوٹھوہار کیمپس گوجر خان کا سنگ بنیاد رکھیں گے۔
اس ضمن میں 4 ارب روپے ہائر ایجوکیشن کمیشن (ایچ ای سی) کو جاری کر دیے گئے ہیں۔اسپیکر قومی اسمبلی راجہ پرویز اشرف نے کہا کہ پنجاب یونیورسٹی پوٹھوہار کیمپس گوجر خان کا قیام میرا دیرینہ خواب تھا جو اب پورا ہونے جا رہا ہے۔
انہوں نے کہا کہ اس یونیورسٹی کے قیام سے گوجر خان سمیت خطہ پوٹھوار اور ملحقہ اضلاع کے نوجوان طلباء وطالبات کا دیرینہ مسئلہ حل ہو گا۔ یونیورسٹی کے قیام سے گوجر خان اور ملحقہ اضلاع میں تعلیم کے شعبے میں نوجوانوں کو گھر کی دہلیز پر اعلیٰ تعلیم حاصل کرنے کے مواقع میسر آئیں گے۔
اسپیکر نے کہا کہ اس منصوبے کی تکمیل سے خطہ پوٹھوہار سمیت دیگر ملحقہ اضلاع اور آزاد کشمیر کے نوجوانوں کو اعلی تعلیم حاصل کرنے کے مواقع میسر آئیں گے۔اس منصوبے کا قیام اسپیکر قومی اسمبلی راجہ پرویز اشرف کا اعلیٰ تعلیم کے فروغ اور خطے کے نوجوان نسل کی ترقی کے لیے ان کی گہری دلچسپی کا عملی ثبوت ہے۔
