واشنگٹن: امریکی صدر ڈونلڈ ٹرمپ نے اعلان کیا ہے کہ امریکا اور بھارت کے درمیان تجارتی رکاوٹیں ختم کرنے کے لیے مذاکرات شروع ہو گئے ہیں۔ ٹرمپ نے اپنے سوشل میڈیا پلیٹ فارم ‘ٹروتھ سوشل’ پر کہا کہ وہ بھارتی وزیراعظم نریندر مودی سے آنے والے ہفتوں میں بات چیت کے منتظر ہیں اور یقین ہے کہ امریکا اور بھارت کے لیے کامیاب نتیجہ حاصل کرنا مشکل نہیں ہوگا۔
بھارتی وزیراعظم نریندر مودی نے بھی مذاکرات کے منتظر ہونے کا اعلان کیا اور کہا کہ دونوں ممالک قریبی دوست اور فطری شراکت دار ہیں۔ مودی نے مزید کہا کہ ٹیمیں مذاکرات کو جلد مکمل کرنے پر کام کر رہی ہیں تاکہ عوام کے روشن مستقبل اور خوشحالی کے لیے نئے مواقع پیدا کیے جا سکیں۔
یاد رہے کہ حالیہ مہینوں میں امریکا اور بھارت کے تعلقات کشیدہ رہے ہیں۔ امریکا نے بھارت پر پہلے ہی 50 فیصد ٹیرف عائد کر رکھا ہے، اور صدر ٹرمپ نے متعدد بار مودی پر تنقید کی تھی۔ صدر نے کہا تھا کہ بھارت نے محصولات صفر کرنے کی پیشکش بہت تاخیر سے کی اور اسی دوران انہوں نے بھارت کا دورہ بھی منسوخ کر دیا تھا۔
