لاہور: وزیر اطلاعات پنجاب عظمی بخاری نے کہا ہے کہ سیلاب زدگان کی مدد کے لیے وزیر اعلیٰ پنجاب کا ریلیف کارڈ بنایا جائے گا تاکہ کسی کو لائن میں انتظار نہ کرنا پڑے۔ انہوں نے بتایا کہ پنجاب کے 7,794 موضع جات متاثر ہوئے اور 26 لاکھ افراد سیلاب سے متاثر ہوئے، جبکہ 21 لاکھ مویشی بھی متاثر ہوئے ہیں۔
عظمی بخاری نے کہا کہ سیلاب کے دوران وزیر اعلیٰ پنجاب خود لوگوں سے بات کرتی ہیں اور فیلڈ میں کام کرنے والی 2,213 ٹیمیں متاثرہ علاقوں میں مدد فراہم کر رہی ہیں۔ انہوں نے بتایا کہ کسانوں کے نقصان کا ازالہ کیا جائے گا، پورے گھر گرا ہونے پر 10 لاکھ، جزوی نقصان پر 5 لاکھ اور مویشی کے نقصان پر 5 لاکھ روپے دیے جائیں گے۔
صوبائی وزیر اطلاعات نے کہا کہ پنجاب میں ترقیاتی کام جاری ہیں اور 80 ہزار گھر زیر تعمیر ہیں جن کی تعداد دسمبر تک ایک لاکھ تک پہنچ جائے گی۔ انہوں نے وفاقی حکومت کی معاونت کی اہمیت بھی اجاگر کی اور کہا کہ بینظیر انکم سپورٹ پروگرام ایک قانون کے تحت ہے اور ہر چیز پر سیاست اچھی نہیں ہوتی۔
عظمیٰ بخاری نے مزید کہا کہ پنجاب کو پانی بچانے کے لیے ڈیم بنانے چاہئیں، ماحولیات کے اقدامات پر عمل جاری ہے، اور بھارتی پنجاب میں فصلیں جلانے کے اقدامات سے ہمارے انڈیکس پر بھی اثر پڑتا ہے۔ انہوں نے کہا کہ سیلاب کے دوران عوام کی خدمت اولین ترجیح ہے۔
