لاس اینجلس : آسکر جیتنے والی اداکارہ اور ہالی ووڈ لیجنڈ ڈیان کیٹن 79 سال کی عمر میں انتقال کر گئیں۔ ان کے اہل خانہ نے پیپل میگزین کو تصدیق کی کہ کیٹن نے اپنے آخری مہینے نجی طور پر اپنے قریبی خاندان کے ساتھ گزارے۔
ٹی ایم زیڈ کے مطابق، 911 کال میں اطلاع دی گئی کہ ہفتے کی صبح کیٹن “زمین پر گر گئی” تھیں، جس کے بعد انہیں لاس اینجلس فائر ڈیپارٹمنٹ نے اسپتال منتقل کیا۔ قریبی دوستوں کے مطابق اداکارہ کی صحت تیزی سے خراب ہو رہی تھی، اور ان کا وزن بھی کافی کم ہو گیا تھا۔
گریمی اور آسکر ایوارڈ یافتہ گلوکارہ کیرول بائر سیگر نے بتایا کہ انہوں نے کیٹن کو چند ہفتے قبل دیکھا، اور وہ بہت دبلی پتلی تھیں۔ کیٹن نے اپنی زندگی کے آخری لمحات اپنے قریبی خاندان کے ساتھ گزارے، اور دوستوں کے مطابق وہ آخری دنوں تک خوش اور پرجوش رہی، اپنی تخلیقی سرگرمیوں میں مصروف رہی اور مزاحیہ مزاج برقرار رکھا۔
ان کے انتقال کے بعد ہالی ووڈ کے ساتھی اداکاروں نے انہیں خراج تحسین پیش کیا۔ گولڈی ہان، سٹیو مارٹن اور کمبرلی ولیمز پیسلی نے اپنے انسٹاگرام اکاؤنٹس پر یادگار پیغامات شیئر کیے۔ مارٹن نے اپنی آن اسکرین جوڑی کی یادیں شیئر کیں، جبکہ ہان نے کیٹن کے ساتھ کام کرنے کی یادگار لمحات کا ذکر کیا اور کہا کہ کیٹن نے ہالی ووڈ کی زندگی کو روشنی بخشی۔ بیٹ مڈلر نے بھی کیٹن کی تعریف کرتے ہوئے کہا کہ وہ مزاحیہ، حقیقی اور فریب سے پاک اداکارہ تھیں۔
ڈیان کیٹن کی یادگار فلموں میں “فرسٹ ویوز کلب” اور “فادر آف دی برائیڈ” شامل ہیں، جن کے ذریعے انہوں نے ہالی ووڈ میں اپنی الگ پہچان بنائی۔
