کراچی: ملک کی ٹرانس جینڈر کمیونٹی نے 25 اکتوبر کو سی ویو بیچ پر اپنا تیسرا سالانہ ہجرہ فیسٹیول 2025 منعقد کرنے کا اعلان کیا ہے۔ اس تقریب میں پاکستان بھر سے ٹرانس جینڈر کمیونٹی کے اراکین کے ساتھ سماجی کارکن، فنکار اور انسانی حقوق کے محافظ شریک ہوں گے۔
کراچی پریس کلب میں پریس کانفرنس سے خطاب کرتے ہوئے کامی چوہدری اور ڈاکٹر سارہ گل نے بتایا کہ اس سال کا میلہ “ہماری شناخت، وقار، آزادی اور ہماری سرزمین کے لیے کھڑے” کے موضوع کے تحت ہوگا۔ کامی چوہدری نے کہا کہ ہجرہ فیسٹیول صرف تفریح کا موقع نہیں بلکہ ٹرانس لوگوں کے لیے اپنی شناخت اور وقار کے اظہار کا ایک طاقتور پلیٹ فارم ہے۔
ڈاکٹر سارہ گل نے کہا کہ یہ تہوار کمیونٹی کی مساوی حقوق اور تحفظ کی جدوجہد کو اجاگر کرنے کے ساتھ ساتھ پاکستان میں خواجہ سراؤں کے حقوق کے تحفظ کے لیے عملی اقدامات کو فروغ دینے کا بھی موقع فراہم کرے گا۔
میلے میں مقامی اور بین الاقوامی فنکاروں کی شرکت کے ساتھ آگاہی سیشنز، ثقافتی شوز، میوزیکل پرفارمنسز اور آرٹ ڈسپلے منعقد ہوں گے۔ منتظمین نے عوام، میڈیا اور سول سوسائٹی سے اپیل کی کہ وہ اس جشن میں شامل ہو کر ہم آہنگی، امن اور شمولیت کے پیغام کو پھیلانے میں مدد کریں۔
