کراچی میں پریس کانفرنس کے دوران پاکستان سپر لیگ کے سی ای او سلمان نصیر نے اعلان کیا کہ اگلے دو سال کے لیے ایچ بی ایل دوبارہ پی ایس ایل کا ٹائٹل اسپانسر ہو گا۔ انہوں نے بتایا کہ لیگ کے آغاز میں کم لوگوں نے دلچسپی ظاہر کی تھی لیکن پی ایس ایل نے ہر مشکل کے باوجود ترقی کا سفر جاری رکھا، حتیٰ کہ کووڈ کے دوران بھی ایونٹ کامیابی سے مکمل ہوا۔
سلمان نصیر کے مطابق دسویں ایڈیشن کے بعد لیگ کی آزادانہ ویلیوایشن کی گئی اور ایچ بی ایل نے اسی نئی ویلیو پر معاہدہ کیا ہے، جو پچھلے معاہدے کے مقابلے میں 505 فیصد زیادہ ہے۔ سی ای او نے مزید کہا کہ پی ایس ایل میں دو نئی فرنچائز شامل کی جائیں گی، اور بولی دینے والی کمپنیوں کو شہروں کے ناموں کے پول میں سے ایک ٹیم منتخب کرنا ہوگی۔
