محکمہ موسمیات نے رواں ہفتے کے دوران ملک کے بالائی علاقوں میں تیز ہواؤں، بارشوں اور برفباری کی پیشگوئی کی ہے۔
محکمہ موسمیات کے مطابق ملک کے بالائی علاقوں میں 4 نومبر سے بارشوں کا نیا سلسلہ شروع ہونے کا امکان ہے جو 5 نومبر تک جاری رہ سکتا ہے۔
آج رات سے مغربی ہواؤں کا ایک سلسلہ ملک کے بالائی علاقوں میں داخل ہوگا، جس کے نتیجے میں بارش، تیز ہوائیں اور بعض مقامات پر گرج چمک کے ساتھ برفباری متوقع ہے۔
4 سے 5 نومبر کے دوران چترال، دیر، سوات، کوہستان، ایبٹ آباد اور ہری پور میں بارش کا امکان ہے۔ صوابی، پشاور، مردان، کوہاٹ، کشمیر اور مظفرآباد میں بھی بارش اور پہاڑی علاقوں میں برفباری کی پیشگوئی ہے۔
اسلام آباد، راولپنڈی، مری، اٹک، چکوال، تلہ گنگ، جہلم اور سرگودھا میں بادل برسنے کا امکان ہے۔ خوشاب، گوجرانوالہ، سیالکوٹ، ناروال اور لاہور میں بھی گرج چمک کے ساتھ بارش متوقع ہے۔
محکمہ موسمیات نے بتایا کہ بارشوں کے دوران درجہ حرارت میں کمی آئے گی اور اسموگ و دھند میں بھی کمی متوقع ہے۔
