آسٹریلیا میں 16 سال سے کم عمر بچوں پر انسٹاگرام اور فیس بک سمیت مختلف سوشل میڈیا پلیٹ فارمز کے استعمال پر پابندی عائد کر دی گئی ہے، جو 10 دسمبر سے نافذ ہوگی۔
حکومت کا کہنا ہے کہ بچوں کی ذہنی و جسمانی صحت کے تحفظ کے لیے یہ فیصلہ ضروری تھا۔ میٹا نے اعلان کیا ہے کہ نابالغ صارفین کے اکاؤنٹس دسمبر میں ڈیلیٹ کر دیے جائیں گے اور والدین یا متاثرہ بچے 4 دسمبر تک اپنا ڈیٹا ڈاؤن لوڈ کر سکتے ہیں۔
قانون کے تحت انسٹاگرام، فیس بک، ٹک ٹاک، ایکس، اسنیپ چیٹ اور ریڈٹ پر 16 سال سے کم عمر افراد کا استعمال مکمل طور پر ممنوع ہوگا، جبکہ یوٹیوب کا استعمال صرف بچوں کے خصوصی ورژن تک محدود رہے گا۔ واٹس ایپ اور میسنجر پر پابندی نہیں ہوگی۔
قانون کی خلاف ورزی پر کمپنیوں کو 3 کروڑ 30 لاکھ ڈالر تک جرمانہ ہو سکتا ہے۔ عمر کی تصدیق کے لیے اے آئی، سرگرمیوں، لائکس اور ویڈیو سیلفی جیسے طریقے استعمال کیے جائیں گے۔
قانون نافذ ہونے کے بعد آسٹریلیا دنیا کا پہلا ملک بن جائے گا جہاں 16 سال سے کم عمر بچوں پر عام سوشل میڈیا استعمال مکمل پابندی کے ساتھ ممنوع ہوگا۔
